Obyektivka (ma'lumotnoma)

Obyektivka (ma'lumotnoma) nima?

Obyektivka — shaxs haqidagi asosiy ma'lumotlar jamlangan rasmiy ma'lumotnoma. Unda tug'ilgan sana va joy, millat, ma'lumot, mutaxassislik, ilmiy daraja, chet tillari, mehnat faoliyati va yaqin qarindoshlar haqida ma'lumot beriladi. Xalq orasida «obyektivka», «obektivka» yoki «ob'ektivka» deb ham yuritiladi.

Obyektivka odatda davlat tashkilotlariga, ta'lim muassasalariga va ko'plab xususiy kompaniyalarga ishga kirishda, lavozim o'zgarganda yoki attestatsiyada so'raladi.

Obyektivka qanday tuziladi?

Shakl ikki qismdan iborat:

• Birinchi sahifa — «MA'LUMOTNOMA»: familiya, ism, sharif, hozirgi lavozim, 3x4 rasm, shaxsiy ma'lumotlar, ma'lumoti va mehnat faoliyati.
• Mehnat faoliyati yillar bo'yicha, eng eskisidan boshlab yoziladi: «2019-2023 yy. – Toshkent axborot texnologiyalari universiteti talabasi». O'qish yillari ham shu yerda ko'rsatiladi.
• Ikkinchi sahifa — yaqin qarindoshlar jadvali: qarindoshligi, F.I.Sh., tug'ilgan yili va joyi, ish joyi va lavozimi, turar joyi.

To'ldirishda nimalarga e'tibor berish kerak?

Familiya, ism va otasining ismi pasportdagidek yoziladi. Partiyaviylik, ilmiy daraja, harbiy unvon, davlat mukofotlari va deputatlik bo'lmasa, «yo'q» deb yoziladi — bu maydonlar avtomatik shunday to'ldirilgan.

Mehnat faoliyatida yillar orasida uzilish qolmasligiga harakat qiling: ishsiz yoki harbiy xizmatda bo'lgan davrlar ham ko'rsatiladi. Hozir ishlayotgan joy uchun «h.v.» (hozirgi vaqtgacha) deb yozing.

Qarindoshlar ro'yxatiga odatda ota-ona, aka-uka, opa-singillar, turmush o'rtog'i va farzandlar kiritiladi. Ba'zi tashkilotlar turmush o'rtog'ining ota-onasini ham so'raydi — talabni oldindan aniqlab oling.

Obyektivka qayerlarda so‘raladi?

Obyektivka ko'pincha quyidagi hollarda talab qilinadi:

• Davlat organlari va davlat tashkilotlariga ishga kirishda.
• Maktab, kollej va oliy ta'lim muassasalariga o'qituvchi yoki xodim sifatida ishga kirishda.
• Magistratura, doktorantura yoki malaka oshirishga hujjat topshirishda.
• Lavozimga tayinlash, kadrlar zaxirasiga kiritish va attestatsiyadan o'tishda.
• Ko'plab bank va yirik kompaniyalarda ishga qabul qilishda — rezyume bilan birga.

Mehnat faoliyati qanday yoziladi: namunalar

Har bir qator «davr – ish joyi va lavozim» shaklida yoziladi. Davr yillar bilan («2019-2023 yy.») yoki aniq sana bilan («2024 y. 1 sentabrdan») beriladi. Qatorlar eng eskisidan boshlab, xronologik tartibda keladi:

• 2015-2019 yy. – Toshkent shahridagi 110-maktab o'quvchisi
• 2019-2023 yy. – Toshkent axborot texnologiyalari universiteti talabasi
• 2023-2024 yy. – muddatli harbiy xizmatda
• 2024 y. – h.v. – «Uzcard» MChJ dasturchisi

Rasm va qog‘ozga chiqarish

Obyektivkaga 3x4 sm o'lchamdagi, yaqinda tushilgan, yuz to'g'ridan aniq ko'rinadigan rasm qo'yiladi. Rasm yuklasangiz, u hujjatda aynan 3x4 sm joyni egallaydi. Rasm yuklamasangiz, uning o'rnida 3x4 ramka chiqadi — chop etilgan obyektivkaga qog'oz rasmni shu joyga yopishtirasiz.

Obyektivka A4 qog'ozga chop etiladi: birinchi sahifada shaxsiy ma'lumotlar va mehnat faoliyati, ikkinchi sahifada qarindoshlar jadvali. Ba'zi tashkilotlar uni kadrlar bo'limi tomonidan tasdiqlashni so'raydi — buni ish joyidan aniqlab oling.

Qanday to'ldiriladi

1. Familiya, ism, sharifingizni kiriting va 3x4 rasm yuklab, kerakli joyini qirqing.
2. Tug'ilgan sana va joy, millat va ma'lumotingizni to'ldiring.
3. Hozirgi lavozimingizni va mehnat faoliyatingizni yillar bo‘yicha qo‘shing.
4. Yaqin qarindoshlaringizni jadvalga qo'shing.
5. O'ng tomondagi namunada hujjat qanday chiqishini tekshiring. Kerak bo'lsa, «Кирилл» tugmasi bilan kirill yozuviga o'tkazing.
6. «Word (DOCX)» yoki «PDF» tugmasini bosing — fayl darhol yuklab olinadi.